विभागाविषयी

दिव्यांग व्यक्तींच्या कल्याण, पुनर्वसन व सक्षमीकरणासाठी स्वतंत्रपणे कार्य करण्याच्या उद्देशाने दिव्यांग कल्याण विभागाची स्थापना दिनांक १५ डिसेंबर २०२२ रोजी करण्यात आली. स्वतंत्र विभाग स्थापन केल्यामुळे दिव्यांग विषयक योजनांची प्रभावी अंमलबजावणी व केंद्रित प्रशासन अधिक सक्षम झाले आहे.

हा विभाग शिक्षण, रोजगार, कौशल्य विकास, सामाजिक सुरक्षा, सहाय्यक साधने व उपकरणे तसेच आर्थिक सहाय्य यांसंबंधित केंद्र व राज्य शासनाच्या विविध योजनांची अंमलबजावणी करतो. तसेच, दिव्यांग व्यक्ती हक्क अधिनियम, २०१६ च्या प्रभावी अंमलबजावणीसाठी प्रयत्नशील राहून, सुलभता व समान संधींचा प्रसार करतो आणि इतर विभागांशी समन्वय साधून दिव्यांग व्यक्तींसाठी समावेशक व शाश्वत विकास सुनिश्चित करतो.

दिव्यांग सहाय्यक पोर्टल हे दिव्यांग कल्याण विभागामार्फत विकसित करण्यात आलेले एक एकात्मिक डिजिटल व्यासपीठ असून, दिव्यांग व्यक्तींना विविध शासकीय योजना, सेवा व लाभांचा एकाच ठिकाणी (Single Window) लाभ मिळावा या उद्देशाने तयार करण्यात आले आहे.

या पोर्टलचा मुख्य उद्देश समावेशकता, समान संधी व डिजिटल सक्षमीकरणाला प्रोत्साहन देणे हा आहे. या माध्यमातून योजना अर्ज, अर्जच्या स्थितीची तपासणी, तक्रार निवारण व संबंधित माहिती सहज उपलब्ध करून दिली जाते. प्रशासकीय प्रक्रिया सुलभ करणे, विभागीय समन्वय बळकट करणे आणि प्रत्येक पात्र लाभार्थ्याला शासनाच्या सेवांचा अखंड व सुलभ लाभ मिळावा यासाठी हे पोर्टल कार्यरत आहे.